ВЕРБАС – Писателька и одвичательна редакторка часопису за дзеци „Заградка” Мелания Римар вчера нащивела дзеци котри у Вербаше виучую руски язик як виборни предмет. Стретнуце було у Основней школи „Светозар Милетич”, а попри школярох з тей, на стретнуцу присуствовали и школяре з Основней школи „Братство єдинство”.
Госцинску привитала учителька Славица Мали, а потим Римарова школяром бешедовала о часопису „Заградка”. У рамикох „Заградкового” конкурсу за найактивнєйши дзеци, з Вербасу за свойо малюнки наградзена школярка Кристина Будински, котрей Римарова уручела награду.
Мелания Римар на тим стретнуцу школяром представела и вецей свойо кнїжки, медзи нїма и найновшу „Гайзибан на шпарґу”, а даскельо кнїжки и подаровала дзецом.
Школяре Валентина Сабадош и Никола Шведич за тото стретнуце пририхтали два рецитациї, а на програми присуствовал и старовербаски парох о. Алексий Гудак, котри нашим школяром у Вербаше преподава виронауку.
