Меновани Школски одбор керестурскей Школи и одбори Дому култури

автор зам
764 Опатрене

КУЛА – Пре виходзенє мандатох, Скупштина општини Кула вчера, 16. юлия, перше розришела дотерашнї, а потим меновала нови Школски одбор (ШО) Основней и штреднєй школи з домом школярох „Петро Кузмяк” (Школа) у Руским Керестуре, як и Управни одбор (УО), та Надпатраюци одбор (НО) Дому култури Руски Керестур.

Спред занятих у Школи до Школского одбору меновани Леона Сабо, Любица Илич и Ясмина Сабадош; спред родичох Владимир Новта, Светлана Папуґа и Срдян Керавица, а спред локалней самоуправи Златана Надь, Владимир Шимко и Наталия Ґовля.

 Як Рутенпрес дознава у Националним совиту (НС) Руснацох, мена нових членох ШО керестурскей Школи менованих спред локалней самоуправи ше розликую од менох хтори НС предложел на своєй Електронскей схадзки о кандидатох за ШО, хтора отримана 9. и 10. юлия.

Як гварели у Совиту, тота одлука СО Кула о менованю ШО Школи нє у складзе зоз законами и после єй ступаня на моц, НС поруша одвитуюци поступки, понеже спрам членох найновшого Закона о основох системи образованя и воспитаня (з 2013. року) и членох Закона о националних совитох националних меншинох (тиж з 2013. року), „у установох у хторих ше у векшини оддзелєньох образовно-воспитни процес окончує на язику националней меншини, национални совит националней меншини предклада трох кандидатох до школского одбору – представительох єдинки локалней самоуправи”. По вименки спомнутих законох, НС предкладали єдного члена.

До УО Дому култури на СО Кула спред локалней самоуправи вчера меновани Янко Николич (за предсидателя), а за членох Владимир Олеяр, Янко Варґа, Янко Мудри, Михайло Бодянец и Юлиян Рамач (спред занятих), док менованє члена УО спред НС Руснацох будзе окончене после дополнююцей процедури о доставаню думаня о зраженю интересох од компетентних державних орґанох.

До НО Дому култури меновани Саша Тасич (за предсидателя), а за членох Снежанка Сабо, спред НС Руснацох и Мирон Хрин, спред занятих у Доме култури.

О горе спомнутих менованих членох до УО и НО Дому култури, НС Руснацох на Електронскей схадзки, теди як кандидатох, дал позитивне думанє.

 

ПОВЯЗАНИ ТЕКСТИ