БЕОҐРАД – На Миколая, 19. децембра, вирни у нашей беоґрадскей парохиї св. Кирила и Методия були домашнї и госцом зоз Сримскей Митровици, а на Служби Божей велї вихасновали и можлївосц висповедац ше пред Крачуном.
По Служби, хтору служел беоґрадски парох о. Владислав Варґа, дзеци привитали Миколая, котрому пририхтали рецитациї и шпиванки. У програми з нагоди Миколая участвовали Яна Бучко, Борис Алексич Питков и Михайло Кахан.
Миколай дзецом подзелєл вецей як 15 пакецики, а по програми за парохиянох орґанизоване пригодне друженє.