Милан Шолая превозиходзи препреченє, алє помоц му и далєй потребна

автор ол. русковски
553 Опатрене

КОЦУР – Милан Шолая зоз Коцура, дакеди успишни рукометаш, а нєшка параолимпиєц, котри перши у Европи и други на швеце у статичней апнеи за особи зоз инвалидитетом, пред даскельома мешацами ше зочел зоз дияґнозу озбильней хороти.

Най здогаднєме, Миланови на контролним препатрунку 12. априла дияґностиковани тумор на похребцини, котри залапел два похребциново персценї и онєможлївене му було и шедзенє. Тумор требало цо скорей одстранїц зоз похребцини, сообщели дохторе, прето же Милана животно загрожовал. Шолайови була нєобходна операция, же би му уложели два штучни похребциново персценї и фиксатор похребцини. Операция котра мала буц окончена початком мая на єдней приватней клинїки у Беоґраду вимагала вельки пенєжни средства.

Теди у Коцуре и Вербаше порушани числени гуманитарни акциї, гуманитарни лицитациї, а оформена и Фейсбук ґрупа За Шолая Милана. Одволали ше числени спортисти котри донирали спортски дреси, лабди, уметнїки котри донирали свойо дїла, людзе котри жадали помогнуц на рижни способи. До збераня пенєжу за Миланово лїченє улючели ше и велї орґанизациї, та так и Гуманитарна фондация „Будз гумани – Александар Шапич” котра дала Миланови число прейґ котрого доставал добродзечни прилоги.

За кратки час назберана сума од 1,3 милиони динари, кельо було потребне же би ше окончела операция. Милан успишно оперовани 10. мая у шпиталю „Атлас” у Беоґрадзе, и оптимистично превозиходзи и тото препреченє и идзе ґу виздравеню.

Зоз Гуманитарней фондациї „Будз гумани – Александар Шапич” апеловали на дальше уплацованє прилогох, понеже Миланови потребни средства за постоперативну регабилитацию, специялистични и контролни препатрунки, баньске лїченє, лїки, суплементи и ортопедски направи. Пенєж мож уплациц прейґ СМС порученя у хторим треба написац 1013 и послац на число 3030 (цена порученя 200 динари), лєбо на динарски рахунок 160-6000000856719-04, и девизни 160600000085727679.

На сайту Гуманитарней фондациї обявене же Миланово лїченє вимага 3.263.502 динари, а понеже Милан нє у можлївосци шицко финансовац, замодлєл шицких гуманих людзох же би му помогли у тей борби.

ПОВЯЗАНИ ТЕКСТИ