Министерка Брнабич винчує Медзинародни дзень людских правох, поруки омбудсманох

автор бета/ртв/зам
1k Опатрене

БЕОҐРАД/НОВИ САД – Министерка державней управи и локалней самоуправи Ана Брнабич гражданом и гражданком Сербиї вчера повинчовала нєшкайши Медзинародни дзень людских правох и виражела довириє же лєм заєднїцка борба процив шицких формох нєтолеранциї и ексремизму може принєсц резултати.

– Жадаме вєдно твориц дружтво у хторим каждому нашому гражданови будзе защицене достоїнство и ґарантоване почитованє його основних людских правох, без огляду на розлики у полу, раси, виросповиданю, лєбо на даяку другу форму розличносци – наведла Брнабичова у писаней вияви.

Защитнїк гражданох Саша Янкович виявел же числени загрожени гражданє Сербиї Медзинародни дзень людских правох препровадза з чувством нєправди и загроженого достоїнства пре розкрок медзи правами хтори маю на паперу и у правдивим живоце.

У писанєй вияви Янкович гварел же найхудобнєйши, особи з инвалидитетом, жени жертви насилства, роботнїки котри остали без роботи пре подли приватизациї, жителє нєлеґалних населєньох, дзеци на улїци – традицийно начувствительнєйши ґрупи у Сербиї.

Покраїнски омбудсман др Зоран Павлович з нагоди нєшкайшого Медзинародного дня людских правох указал на важносц людских правох и обовязку державох же би обезпечели обще почитованє и применьованє людских правох и шлєбодох.

– Особи котри пре даяку катастрофу, худобство, хороту, возрост, пол, лєбо пре припадносц даякей меншинскей дружтвеней ґрупи жию у страху за власни живот лєбо еґзистенцию своєй фамелиї и надалєй числени – оценєл Покраїнски омбудсман.

Медзинародни дзень людских правох означує ше од 1950. року, як здогадованє на 10. децембер 1948. року, кеди подписана Универзална декларация Зєдинєних нацийох о людских правох и кеди перши раз у историї чловечества припознате право шицких людзох на живот, шлєбоду и сиґурносц, без було яких розликох.

ПОВЯЗАНИ ТЕКСТИ