Министерство жада унапредзиц образованє националних меншинох

автор  маф
991 Опатрене

РУСКИ КЕРЕСТУР – Национални совит Руснацох (НС) у Руским Керестуре вчера нащивели представителє новооснованей Роботней ґрупи за унапредзенє образованя националних меншинох Министерства просвити Републики Сербиї – член Роботней ґрупи проф. др Ґоран Башич з Центру за виглєдованє етницитету, та Ясминка Перуничич Ален и Йована Мастилович з Министерства просвити.

Зоз станом и проблемами у образованю по руски на шицких уровньох у наших штредкох и його специфичносцами, госцох упознали предсидатель Вивершного одбору Совиту Желько Ковач, предсидателька Одбору за образованє НС Мелания Римар и членїца НС и о.д. директора керестурскей Школи „Петро Кузмяк” Хелена Пашо Павлович.

Як вельки проблеми констатоване вше менше число наших школярох, як пре миґрациї до городох и иножемства, так и пре зменшани наталитет, асимилацию, алє и нєдостаточну заинтересованосц за образованє на мацеринским язику.

Представителє нашого НС винєсли вецей суґестиї и предкладаня за запровадзованє спомнутих мирох у будуцим Акцийним планє за образованє националних меншинох на шицких уровньох, хтори пририхтує Министерство, а праве таки сходи з представителями шицких националних совитох у Сербиї, Министерство орґанизує пре конкретни предлоги за унапредзенє образованя на язикох меншинох.

3-NS-02

ПОВЯЗАНИ ТЕКСТИ