КУЛА – Министер за роботу, обезпечованє роботи, борецки и социялни питаня Александар Вулин Центру за социялну роботу Кула вчера уручел нову превозку, за цо Влада Сербиї видвоєла милион и пол динари. На уручованю превозки присуствовал и предсидатель Општини Кули Драґан Трифунович, а ключи прияла директорка Центру Ґордана Вакула.
З тей нагоди Министер Вулин похвалєл роботу кулского Центру и гварел же за його опреманє Министерство 2014. и 2015. року унапрямело 1,4 милиони динари. Наглашел же ресорне министерство питаня центрох за социялну роботу трима за похребцину социялней защити и без огляду же им снователє локални самоуправи, їх роботу ше нєпреривно помага и з уровню держави, так же за социялни даваня у Сербиї уложени 4 милиярди 529 милиони динари.
Дзекуюци на превозки, директорка Центру за социялну роботу Кула Ґордана Вакула визначела же за добру социялну роботу важни контакт з хаснователями и правдиви увид до проблемох и условийох у яких жию, так же и нова превозка допоможе одходзеню на терен и до нащивох загроженим фамелийом.
З тей нагоди поведзене и же кулски Центер єден з найстарших таких установох у держави и праве у тим мешацу означує 55-рочнїцу роботи, а тераз у општини ма коло 5 000 хасновательох.
Под час нащиви министер Александар Вулин винєсол и податок же Влада Сербиї у фебруару того року за рижни социялни даваня у Войводини видвоєла милиярду 339 милиони динари, так же, як гварел, кед ше бешедує о тих 7 одсто и чи ше уклада до Войводини, чи нє, треба водзиц рахунку о тим же Влада Сербиї сполнює свойо обовязки и же, як визначел – анї єдно социялне даванє до Войводини нє зменшане и нє пожнєло.
