СУБОТИЦА – Одкладаня приватизациї медийох нє будзе, а перши поволанки мож обчековац у наступних дньох, поведзене на семинаре АНЕМ-у, чия тема була применьованє медийских законох у Суботици.
Державни секретар у Министерстве култури и информованя Саша Миркович гварел же одкладанє того процесу приватизациї нє будзе, а ключну улогу у тей роботи маю Министерство привреди и Аґенция за приватизацию.
– Без огляду на рижни вияви и спекулациї же придзе до одкладаня того термину, я вам твердзим же ше тоту опцию анї нє розпатра. И далєй бешедуєме о 1. юлию того року як остатнїм дню за приватизацию и виход держави зз власнїцкей структури медийох на шицких уровньох власци – гварел Миркович новинаром.
Миркович тиж обчекує же пошвидко будзе закончени процес одлучованя о проєктним софинансованю и на уровню Министерства и на уровню локалних самоуправох, та од 1. януара 2016. року на локалним уровню будзе постояц лєм проєктне софинансованє.
Бешедуюци о приватизациї медийох, министер привреди Желько Сертич гварел же би по 1. юлий 72 медийски подприємства мали буц приватизовани.
Кед тот процес по тот датум нє будзе закончени, Сертич гварел же акциї медийских подприємствох буду подзелєни роботнїком, а кед же их роботнїки одбию, тоти подприємства буду сцерани з реґистру.