НОВИ САД – Бешедуюци о планованю буджету за 2017. рок, предсидатель Покраїнскей влади Иґор Мирович вовторок, 6. децембра гварел же є барз задовольни з рамиком хтори АПВ достала у Предлогу буджету Републики Сербиї за идуци рок и
прецизовал же Войводина достанє вецей средства од суми предписаней з Уставом Сербиї, алє же будзе применєни иншаки модел финансованя явних потребох – на основи розвойного и економски оправданого принципу.
Ґу тому, значни инвестициї у Войводини буду финансовани директно з републичного биджету, як цо то законченє вибудови Жежельового мосту, вибудов нового будинку Радио-телевизиї Войводини и предлуженє вибудови Народного театру у Суботици, та по тей основи, як гварел Мирович, „ошлєбодзени” средства у покраїнским буджету и буду унапрямени на други проєкти.
Иґор Мирович додал же Покраїна рефинансує драги кредити скорейшей власци з туньшима, та ше и ту зашпорує медзи 200 и 300 милиони динари, хтори тиж буду опредзелєни за розвойни проєкти.
Предсидатель Покраїнскей влади винєсол и огляднуце на вияву премиєра Сербиї Александра Вучича же пошвидко будзе отворени диялоґ о вершинским закону о финансованю Войводини и гварел же його приношенє важне же би ше „нє повторело гришки гевтих котри пред нами тот нєдокончени стан хасновали за роботи хтори були на чкоду АП Войводини и єй гражданох”.