КОЦУР – Вчера у Велькей сали Месней заєднїци у Коцуре Фодбалски клуб (ФК) „Искра” отримал Рочну скупштину, на хторей присуствоваяли коло 30 члени и симпатизере „Искри”, алє управа Клубу нє задовольна з таку слабу нащивеносцу, бо на Скупштину нє пришли анї шицки члени Предсидательства.
Звит о роботи у прешлим року поднєсол предсидатель ФК „Искра” Виктор Ґрешак, котри оценєл же прешли рок бул успишни, понеже „Искра” полусезону закончела на першим месце на таблїчки, а освоєла и перше место на турниру Спортских бавискох „Яша Баков”.
Тренер Здравко Бабич поднєсол звит о своєй роботи и винєсол статистични податки о каждому фодбалерови окреме и наявел же пририхтованя за нову сезону почню 6. фебруара.
За финансийни звит бул задлужени Владимир Цап, котри гварел же, и попри шицких финансийних проблемох и нєпоядного финансованя од Општини Вербас, Клуб заш лєм рок закончел з плусом од 38,522 дин. у буджету.
На Скупштини ґолман Мирослав Ступар з Коцура преглашени за найлєпшого бавяча ФК „Искра” у прешлим року.
Предсидатель Фодбалского клубу Виктор Ґрешак присутних поинформовал о реорґанизациї лиґох, понеже ше Жабель и Титель одвоєли, та „Искра” припадла под подруче Суботици и евентуални пласман до подручней лиґи ю одведзе до Подручней лиґи Суботица, место до Подручней лиґи Нови Сад, як було дотераз.
