АМСТЕРДАМ (ГОЛАНДИЯ) – Найлєпши дзешецбоєц Сербиї Михаил Дудаш вчера освоєл бронзову медалю на Европским першенстве у атлетики у Амстердаму з вєдно 8 153 бодами. То вообще перша даєдна медаля у дзешецбою за Сербию, а перша хтору нашо атлетичаре освоєли на тим Европским першенстве.
У єдней з найчежших атлетски дисциплинох, у дзешецбою, на Европским першенстве у Голандиї ше 6. и 7. юлия змагали 28 атлетичаре. Перши дзень, после 5 дисциплинох, Михаил освоєл 4 199 боди и бул на другим месце, а вчера, на основи посцигнутих резултатох преходзел з другого на треце место, хторе и затримал до конца змаганя.
У вчерайших пейц дисциплинох – у обегованю на 110 метери з препреченями завжал пияте место зоз 14,55 сек., алє у руцаню диску бул бул одлични треци з преруценима 45,65 метерами. У скаканю до висока з палїцу прескочел 4,70 метери, после руцаня копиї бул на трецим месце, а у остатнєй дисциплини дзешецбою – у обегованю на 1 500 метери, гоч 100 метери пред цильом бул на другей позициї, закончел на седмим месце з найлєпшим своїм резултатом у сезони 4:30:90 минути.
Перше место у дзешецбою освоєл Томас ван дер Платсен з Голандиї зоз 8 218 бодами, а друге Чех Адам Хелцелет зоз 8 157 бодами.
Михаилови на посцигнутим позарядовим успиху такой вчера повинчовали министер младежи и спорту Сербиї Ваня Удовичич и городоначалнїк Нового Саду Милош Вучевич.
– Щиро винчуєм Дудашови и його тиму на тим успиху! Кажда чесц! – гварел медзи иншим министер Удовичич, а городоначалнїк Вучевич у своєй винчованки наглашел городосц Новосадянох и цалей Сербиї пре Михаилов успих:
– Нєшка нас окреме гордих направел Михаил Дудаш, наш сограждан, котри, сиґурни сом, войдзе до историї, бо за нашу жем освоєл першу дакеди освоєну медалю у дзешецбою – гварел Вучевич, наглашуюци же Город Нови Сад и надалєй будзе давац потримовку нє лєм Михаилови и атлетичаром, алє шицким спортистом.