НОВИ САД – У виборе за титулу „Найлєпша дестинация 2016”, хтори тирва од 20. януара по 10. фебруар, после пейц дньох гласаня участвовали вецей тисячи гласаче котри свойо гласи давали 20 дестинацийом номинованим за спомнуту титулу. На тей лїстини и Нови Сад, на инициятиву орґанизатора, хтори препознал квалитет туристичного понуканя Нового Саду и потенциял городу же би ше представел у кругу найзначнєйших европских туристичних дестинацийох. За тераз, по числу гласох, Нови Сад у горнєй часци таблїчки.
У седмим виборе за титулу „Найлєпша дестинация 2016” уж на початку, у перших пейц дньох, зазначени 130 000 гласи, гваря информациї хтори Туристична орґанизация Городу Нови Сад (ТОНС) достала од Европскей орґанизациї „Eurpoean Best Destination.
– По дотерашнїм гласаню Нови Сад медзи дзешец городами хтори достали найвецей гласи. То барз вельки успих за наш город, бо ше, наприклад Лондон, находзи под нами – визначую у ТОНС-у.
Прешлого року тоту престижну титулу достал Бордо у Французкей , а попри Нового Саду, за титулу „Найлєпша дестинация 2016” номиновани Рим, Париз, Лондон, Барселона, Прага, Мадрид, Нант, Брисел, Задар, Котор, Никозия, Пловдив, Беч, Милано, Атина, Берлин, Амстердам, Единбурґ и Азорски острова.
Гласац може кажде на сайту www.vote.ebdest.in и нє треба ше окреме реґистровац.