Емисия за младих „Останьце нашмеяни” ше емитує на трецей програми радия РТВ скоро 10 роки. У юнию того року ше закончела дзевята сезона, а 5. октобра почала дзешата. Пририхтую ю и реализую Саня Маркович и Саня Полдруги, шицким познати як Два Санї. Настала зоз дакедишнєй емисиї з назву „Одгуки з ровнїни”, а 2005. року Саня Маркович и Саня Полдруги постали єй авторки.
− Татяна Беук Латяк була редакторка емисиї „Одгуки з ровнїни”, а нашо сотруднїцтво почало кед сом з єдней нагоди госцовала у тей емисиї и вона ше ми питала чи сом заинтересована пририхтовац таку емисию. Понеже Саня и я пайташки одмалючка, бувши коцурски, а теди зме були и цимерки у Новим Садзе, лоґичне ми було же ми вона будзе пара – здогадує ше Саня Полдруги.
− Обидва зме мали вельо обовязки, розпорядки нам були иншаки и дакеди зме ше днями нє видзели, гоч зме бивали вєдно. Хибел нам заєднїцки гоби. Тота емисия постала наша „кафа”, нашо друженє. У студию зме ше и шмеяли як шалєни, и плакали, алє слухаче тото нїґда нє могли обачиц. То були нашо хвильки – додава Саня Маркович.
На самим початку им, як гваря, найвецей помагала Татяна Беук Латяк, пририхтовала их и уводзела до роботи. З часом ше розвивали и усовершовали, а кажду емисию закончовали зоз препознатлївим мотом: „Останьце нашмеяни”. Тот мото бул симпатични тедишнєй редакторки тей емисиї Анамариї Пап (тераз Ранкович) и 2009. року емисия достала нєшкайшу назву, а Саня Маркович постала редакторка.
ВАЖНА АФИРМАЦИЯ И ПОВРАТНА ИНФОРМАЦИЯ
Емисия „Останьце нашмеяни” облапя наисце вшелїяки теми, провадзи шицки актуалносци и збуваня хтори вязани за младих.
− Вше ми завадзало кед ше младих занєдзбовало. Єст велїх хтори ше закладаю, хтори робя, успишни су, дахто пише, дахто шпива, рисує, рецитує итд. Чкода кед ше их замеркує и похвалї лєм раз. Кед дахто на гоч яки способ збогацує свою заєднїцу, а заєднїца нє одреаґує и нє потрима го, тота особа ше звичайно розчарує, аж дзекеди и страци чувство припадносци ґу нєй. Так може настац вельки проблем. Шицки вец поставяю питанє: Дзе млади? Циль, алє и обовязка нашей емисиї и медийох вообще праве препознац и припознац шицких хтори ше визначую. Намагаме ше дац младим вецей простору, обрациц увагу на нїх, поряднє прецаговац їх мена през емисию, же би достали увагу яку заслужую – толкує Полдругова.
Вше провадза збуваня, а потераз обробели наисце рижнородни теми, як гваря, од проблемох наркоманиї до госцованя младого паноца. Же би провадзенє руских медийох постало звикнуце младшей ґенерациї, емисия ма даскельо кратки рубрики: Лексикон, Мой перши динар, Ин и аут, Мойо два минути, 30 секунди явно на радию, Путуйме, як и нова рубрика Нє шицко таке чарне. През нїх млади маю нагоду представиц ше и афирмовац ше.
ФЕЙСБУК ОТВОРЕЛ ДЗВЕРИ
Два Санї почали робиц тоту роботу вєдно, а сам початок нє бул лєгки.
− Мали зме вельо почежкосци. Ми „пребивали ляд”, мушели зме барз нагваряц людзох же би нам дали вияви. Млади теди були завартейши як нєшка и мушели зме их цагац за рукав же би пришли госцовац у нашей емисиї. Медзитим, нїґда зме нє одуставали и вше зме ше намагали потолковац людзом же то нє страшне, же ми намонтираме знїмки, виштригнєме шицки нєпотербни слова, гришки, сербизми, загакованя и подобне. Прешвечовали зме младих же то добре, насампредз, за нїх. Дзекуюци нашей упартосци, алє и розвою технолоґиї, интернета, Фейсбука, тераз наисце нє маме тот проблем. Млади вельо шлєбоднєйши и отворенши, сами ше явяю, и барз нам мило прето, а и тераз нам лєгчейше робиц – припознаваю вони.
Пре нагли розвой технолоґиї емисия прешла през рижни фази трансформациї. Од огромного касетофона, прейґ рижних диктафонох и микрофонох, касетох и мини-дискетох, до интернета и нєшкайшого „маранц знїмача”, алє през тоти дзешец роки Санї научели хасновац шицко. Знашли ше и затримали и слухачох и квалитет емисиї.
− Кед зме отверали заєднїцки Фейсбук бок, перше зме го пробовали наволац по нашей емисиї, потим „Саня и Саня”, медзитим, теди Фейсбук нє мал таки можлївосци. После даскелїх пробованьох написали зме лєм „Два Санї” и порадзели ше же пременїме док годно. Медзитим, кед могло пременїц, Фейсбук уж могло мац на кирилки, ми уж мали вельо приятельох и зложели зме ше же нє будземе нїч меняц. Два Санї постали часц наших идентитетох – гвари Марковичова.
ЇН И ЯНҐ
Емисия динамична, за цо напевно заслужни їх розлични характери.
− Ми зошицким два процивносци. Вироятно ше прето и складаме, бо надополнюєме єдна другу. Я любим длуго спац, углавним сом опущенша и мам кеди, док Саня барз одвичательна, вчас става и орґанизованша є – гвари Полдругова, а Марковичова предлужує:
– Наисце зме Їн и Янґ. Тоти розлики зме пренєсли и до емисиї. За спонтаносц и емотивносц заслужна Саня, хтора отворенши тип особи, а тоту озбильну ноту и даяки гранїци отримуєм я. Кед то потребне, Саня ме опущи и змири, а я ю „прицискам”. Людзе нас аж и препознаваю як „плаву и чарну Саню”, а мушим припознац же дараз и ми сами маме чувство же зме два половки єдней цалосци.
Праве пре розлики медзи нїма, їх емисия ориґинална, а дзекуюци намаганю, упартосци и пошвеценосци, нєшка Два Санї и „Останьце нашмеяни” нє лєм радио-емисия, алє шлєбодно мож повесц – бренд.
Санї длугорочно сотрудзую зоз часописом МАК, зоз орґанизацию Pact Ruthenorum, Форумом младих рускей Матки, потримую и промовую манифестацию Дньовка, Водова Фест, маскенбали, медзинародни волонтерски камп, ґрупу Crazy Cousins, телевизийну емисию Часи младосци и подобне.
− Контакт зоз другима орґанизациями и поєдинцами нам барз важни и нїґда нїкого нє доживюєме як конкуренцию. Почитуєме єдни других, помагаме себе и олєгчуєме роботу – наглашую Два Санї.
ПРОГРАМА
Емисия „Останьце нашмеяни” ше емитує кажди вовторок на 12:30 на трецей програми радия РТВ, програми на руским язику, на 100 MHz, а мож ю провадзиц и на интернету, на сайту РТВ, на одложеним слуханю. Линки за емисию мож пренайсц и на Фейсбук боку Два Санї.
АУДИЦИЯ ЗА НОВИХ ВОДИТЕЛЬОХ
После дзешец рокох емисиї „Останьце нашмеяни” зявела ше потреба же би тоту улогу превжали младши водителє. Кажде хто заинтересовани опробовац ше у такей роботи може ше явиц Саньом до инбоксу на їх Фейсбук профилу.
− Любели бизме кед би ше явела водительска пара хтора ше позна и будзе ше дополньовац. Важне же би були позитивни, комуникативни и креативни, же би озбильно похопели тоту роботу, а ми и шицки члени рускей редакциї им помогнєме и помали их будземе уводзиц до роботи – поволую Два Санї.
