Награди и припознаня

автор саб
877 Опатрене

НОВИ САД – Першираз за 70 роки виходзеня новинох „Руске слово“, Новинско-видавательна установа на шветочносци з нагоди ювилею вчера додзелєла и новинарски награди терашнїм и дакедишнїм занятим, котри у предходних деценийох и рокох, як и тераз, допринєсли и зоз свою роботу доприноша нєшкайшому випатрунку и змисту глашнїка по руски.

Награду за доприношенє квалитету новинох „Руске слово” достал їх длугорочни новинар и редактор Михайло Симунович, награду за рубрику у новинох достала терашня редакторка рубрики „Людзе, роки, живот” Славица Фейса, а награду за активне дньове информованє з терену шеф дописовательства „Руского слова” и редактор „Рутенпресу” Михайло Зазуляк.

Новинарски награди достали и двойо найвреднєйши вонкашнї сотруднїки – дакедишнї новинар и редактор у „Руским” и НВУ, а тераз його порядни сотруднїк Дюра Латяк наградзени як представитель старшей, а порядна сотруднїца новинох „Руске слово”, Рутенпресу и МАК-у, новинарка Сенка Надь з Руского Керестура, як представитель младшей ґенерациї наших новинарох.

НВУ „Руске слово” з нагоди 70-рочнїци додзелєло и припознаня институцийом и орґанизацийом з хторима роки успишно сотрудзує – Покраїнскому секретарияту за културу и явне информованє, Националному совиту Руснацох, Апостолскому еґзархату за грекокатолїкох у Сербиї, Радио-телевизиї Войводини и Друкарнї „Максимаґраф” з Петроварадину.

 3-Nahradzeni-02

ПОВЯЗАНИ ТЕКСТИ