РУСКИ КЕРЕСТУР – Медзинародне сотруднїцтво Руснацох зоз Словацкей, України, Горватскей и Сербиї всоботу, 25. априла, витворене и у обласци спорту, прейґ Медзинародного турниру у одбойки хтори отримани у Руским Керестуре. З дзевец екипох, кельо участвовали, перше место освоєла екипа „Славия” зоз Свиднїку, зоз Словацкей, друге место освоєла екипа вербаского Културно-просвитного дружтва „Карпати“, а треце госци з Ужгороду, з України, екипа „Подкарпатски Медведзи“.
З Горватскей на Медзинародним турнире участвовала екипа „Координация Русинох“ з Петровцох, хтора завжала 9. место.
Попри спомнутей екипи КПД „Карпати”, з наших местох екипа Руского културного центру Нови Сад освоєла 4. место, керестурски екипи – Школи „Петро Кузмяк“ завжала 5., а „Трамонте“ 6. место. Екипа Дружтва Руснацох зоз Суботици була 7., а заєднїцка екипа ДОК-КУМ з Коцура завжала 8. место.
Екипи були подзелєни до трох ґрупох, a змаганя ше паралелно бавело у физкултурней сали Школи „Петро Кузмяк“ и школско-спортскей гали. После змаганьох по ґрупох, за пласман бавели свиднїцка „Славия”, ужгородски „Подкарпатски медведзи“ и КУД „Карпати”, дзе найлєпша була екипа зоз Словацкей, цо нє чудує понеже єй бавяче бавя у першей лиґи Словацкей.
Водзаци екипи з Ужгороду на Медзинародним турнире у одбойки у Керестуре бул проф. др Павло Чучка, а на Турнире присуствовал и треци секретар Амбасади України у Сербиї Богдан Кост. Словацку екипу до Керестура предводзела предсидателька Одбору за образованє, културу, спорт и младеж городскей управи Свиднїк Вєра Дерцова и одборнїца у скупштини Свиднїку Надя Федоркова. На чолє екипи з Петровцох бул Звонимир Ерделї.
Орґанизаторе Медзинародного турниру у одбойки були Спортски бависка (СБ) „Яша Баков”, Основна и штредня школа з домом школярох „Петро Кузмяк“ и Месна заєднїца (МЗ) Руски Керестур. Турнир отворела директорка Школи и членїца Националного совиту Руснацох Хелена Пашо Павлович, а попри нєй, госцох у мено СБ привитал їх подпредсидатель Иван Папуґа, а у мено МЗ предсидатель Совиту Владимир Олеяр. Медзи госцами були и предсидателька Скупштини Општини Кула Снежана Мркаич и директор Заводу за културу войводянских Руснацох Серґей Тамаш.
Делеґациї з України и Словацкей всоботу нащивели и Катедралну церкву св. о. Миколая, Водицу, дзепоєдних керестурских привреднїкох, як и паприґарох, односно терашнї роботи з паприґу.
