РУСКИ КЕРЕСТУР – На традицийним змаганю у спортским лапаню рибох „Чукияда“, у орґанизациї рускокерестурского Здруженя спортских рибарох „Коляк”, вчера участвовали 15 рибаре з Керестура, Кули и Крущичу, а перше место з двома влапенима чуками, вкупней чежини 1 190 ґрами, завжал Владимир Дудаш з Керестура.
Мирко Фекете и Мирко Лазор обидвоме влапели риби вкупней чежини 795 ґрами, та по правилох утвердзених пред змаганьом, друге место завжал Фекете, понеже його змагательне число було векше, а треце Лазор.
Котизация за змаганє була 500 динари, а награди були пенєжни, так же перша награда виноши 50 одсто од уплаценей котизациї, друга 30, а треца 20 одсто з котизациї.
Змаганє отримане на часци беґелю од базену по брану, учашнїки були углавним старши, котрим рибарство гоби, а „Чукияда“ була нагода и за друженє.
Як дознаваме од рибарох, „Чукияду“ ше отримує од 2007. року, а з ню Здруженє „Коляк“ означує Дзень ошлєбодзеня Керестура у Другей шветовей войни.