Народна скупштина конституована, вибор предсидателя на пондзелок

автор сен/зам; фото:с.надь
1.1k Опатрене

БЕОҐРАД У Скупштини Сербиї вчера потвердзени мандати 250 посланїком, з чим конституоване єденасте зволанє Народней скупштини, а посланїки дали и шветочну пришагу.

У новим зволаню Скупштини дотерашня народна посланїца Олена Папуґа (ЛСВ) и надалєй будзе окончовац тоту длужносц, а як гварела за Рутенпрес, и далєй жада буц у Скупштинских одборох за образованє и людски и меншински права. Як припаднїца єдней з националних меншинох окреме єй значни интереси меншинох и унапредзованє обласци образованя на язикох националних меншинох.

На предлог векшинскей колациї коло Сербскей напредней странки (СНС) за предсидательку Народней скуштини, як єдини кандидат, предложена Мая Ґойкович (СНС), котра и у прешлим зволаню окончовала тоту функцию. После консултацийох посланїцких клубох, за подпредсидательох Скупштини предложени Дьордє Миличевич (СПС), Ґордана Чомич (ДС), Веролюб Арсич (СНС), Константин Арсенович (ПЗПС), Владимир Маринкович (СДПС), Вєрица Радета (СРС) и Ясмина Николич (Рух „Досц було”).

Медзитим, после длугей розправи, провадзеней и з медзисобнима обтужованями посланїкох з векшини и меншини, предшедуюци (як найстарши посланїк) Драґолюб Мичунович (ДС) коло 20 г. претаргнул схадзку и єй предлуженє заказал за пондзелок, 6. юний. На предлуженю би мал буц вибрани предсидатель и подпредсидателє и меновани ґенерални секретар Скупштини.

Окрем потвердзованя мандатох и пришаганя, у Скупштини вчера формовани и 16 посланїцки клуби.

После позарядових виберанкох 24. априла до парламенту вошли 12 лїстини, а найвецей мандати 131 освоєла лїстина „Александар Вучич-Сербия победзує” коалициї коло СНС.

ПОВЯЗАНИ ТЕКСТИ