РУСКИ КЕРЕСТУР – На вчерайшей схадзки Орґанизацийного одбору Фестивалу рускей култури „Червена ружа”, на хторей присуствовал и предсидатель Националного совиту (НС) Руснацох Славко Рац, спатрени финансийни звит з тогорочного, а на схадзки акцент дати на планованє идуцого Фестивалу. Одлучене же нарок „Червена ружа” будзе 24, 25. и 26. юния.
Директор Дому култури Йоаким Рац членох Одбору поинформовал о финансийох тогорочней „Ружи” и винєсол же приходи Фестивалу були милион 502 350 динари, вкупни трошки милион 776 670 динари, цо 220 000 вецей як плановане. Часц того покрите з пенєжу заробеного з предатих уходнїцох.
Члени Одбору визначели же би требало померковац на финансиї, понеже ище 2016. року мож раховац на пенєж з керестурского самодоприносу, а вец потребни средства годно доставац лєм по проєктним финансованю. Надпомнуте и же би у векшей мири як су тераз обновиц и дакедишнї спонзорства за Фестивал.
За идуцу, 55. „Червену ружу” плановани вименки у єй концепциї, дзе предсидателька Одбору за културу НС Ґабриєла Саянкович предложела же би пияток, после „Пупча”, наступали културно-уметнїцки дружтва з наших местох з часцами своїх репертоарох. Тиж так, єдно з предкладаньох же би дзеци котри участвую на „Червеним пупчу” до Керестура пришли уж дополадня и були госци своїх парнякох-Керестурцох.
На схадзки винєшена идея же би соботова вечарша програма була з трох часцох, дзе би бул репрезентативни руски блок, наступ реномованого госцуюцого ансамблу Русинох з иножемства, та естрадно-комерциялни концерт.
Єден з предлогох и же би на соботовей, як поведзене – репрезентативней програми Фестивалу, у нашим блоку вецей нє наступали побиднїки з руских фестивалох, алє треба оформиц окремну фахову комисию хтора одредзи хтори точки з наших дружтвох наступя у тей часци Фестивалу. Орґанизацийни одбор предложел же би тоту комисию цо скорей оформел Одбор за културу НС.
Внєдзелю би, попри змаганя за найкрасши глас младих шпивачох, була презентована нова музична творчосц, односно нови шпиванки у забавним духу, и же би тота програма Фестивалу була у Велькей сали Дому култури. Уж и тогорочни, а и будуци нови забавни композициї и за дзеци треба зазначиц авдио и визуално, заключене на схадзки.
И на самей тогорочней „Червеней ружи”, а потим и у анализи после єй отримованя на Орґанизацийним одборе, було вельо зауваги на озвучованє, та ше роздумує о купованю потребней опрему за „Ружу”, хтору би могли хасновац и други нашо фестивали.
Дом култури уж обновел свою опрему з новима микрофонами и другима часцами, алє то нєдостаточне за тоту намену, та порадзене же по идуцу схадзку Орґанизацийного одбору Фестивалу будзе виробена спецификация потребней опреми и кадрох за таку роботу. После того будзе познате чи єст можлївосци за таке укладанє.
