КОВАЧИЦА – После ширшого роботного сходу представительох националних совитох (НС), односно Координациї НС националних меншинох у Сербиї, хтори у Ковачици отримана 19. и 20. септембра, НС пoрихтани за отверанє Поглавя 23 у приступних прегваркох за уходзенє до Европскей униї (ЕУ), хторе ше одноши на людски и меншински права.
На роботней схадзки у Ковачици конкретизовани и финализовани предлоги и вимоги за обласци над хторима НС маю компетенцию (образованє, информованє, култура и службене хаснованє язика и писма) дати на першим таким сходзе початком мая, тиж у Ковачици, а окреме и за Акцийни план за Поглавє 23 у приступаню до ЕУ. По одборох и вєдно, на схадзки у Ковачици робели представителє 20 з 18 НС у Сербиї, понеже нє присуствовали лєм представителє нємецкого и болгарского Совиту.
Як за Рутенпрес гварел предсидатель Вивершного одбору НС Руснацох Желько Ковач, котри вєдно зоз заменїком предсидателя Совиту Йовґеном Мудрийом и предсидательку Одбору за образованє НС Мелания Римар присуствовал на терашнєй роботней схадзки у Ковачици, попри за Акцийни план, Координация за шицки обласци пририхтала и план предлогох ресорним министерством за евентуални вименки, лєбо дополнєня законох котри важни за национални меншини.
Тиж потвердзени и стаємни состави делеґацийох НС националних меншинох хтори их буду заступац у прегваркох з компетентнима министерствами о питаньох и вимогох вязаних за национални меншини у Сербиї, а попри у вирабяню Акцийного плану за Поглавє 23 на уровню держави, наявене же и представителє Коодинациї буду участвовац у прегваркох о тим поглавю.
Як гварел Ковач, на схадзки у Ковачици велька увага дата образованю на язикох меншинох, дзе и вимоги Руснацох, хтори у тей обласци подобни як и з других националних заєднїцох.
– Значне же участвуєме на тих сходох, же зме часц Координациї и интерес и нам и другим меншином же би ше проблематику ришовало зоз заєднїцким наступом спрам ресорних министерствох. Так и вимоги НС Руснацох убудовани до заєднїцких заключеньох и вимогох, а до конца тижня достанєме и пречисцени текст Акцийного плану – гварел Ковач после сходу у Ковачици.