Национални совит подаровал лап-топи руским медийом

автор И. Сабадош, Фото В. Вуячич
505 Опатрене

НОВИ САД – Представителє Националного совиту Руснацох вчера, пондзелок, 6. септембра, у Новим Садзе уручели нову технїчну опрему руским медийом – руским редакцийом телевизиї и радия Явней медийней установи  РТВ Войводини, и НВУ „Руске слово”, чия вкупна вредносц 280 тисячи динари. Купованє опреми финансовал Национални совит Руснацох, односно його Одбор за информованє.

Руски ТВ и радийска редакция РТВ достали по лап-топ рахункар, а „Руске слово” лап-топ рахункар и репортерски фото-апарат, хтори наменєни за потреби „Рутенпресу”, односно Дописовательства „Руского слова” у Руским Керестуре.

Технїчну опрему руским редакцийом РТВ уручели предсидатель Одбору за информованє НС Руснацох Яким Винаї и секретар Совиту Таня Арва Планчак, а „Рускому слову” Винаї и предсидатель НС Руснацох Борислав Сакач.

Як надпомнул Яким Винаї, Одбор за информованє односно Национални совит скоро кажди рок, спрам обєктивних можлївосцох часц буджета опредзелюю за технїчне опреманє руских медийох. Так 2019. року подаровани екстерни мемориї за чуванє диґиталних податкох, а тераз опрема потребна за продукованє и обробок медийних змистох.

Предсидатель Националного совиту Руснацох Борислав Сакач визначел же того року технїчну опрему достали векши руски редакциї, а нарок Совит на подобни способ пробує потримац и даєдни други медиї лєбо орґанизациї хтори продукую автентични медийни змисти по руски.

ПОВЯЗАНИ ТЕКСТИ