БЕОҐРАД – За финансованє роботи националних совитох националних меншинох у Сербиї у тим року з буджету Републики видвоєни 245 милиони динари, виявела после вчерайшей схадзки з представителями националних совитох (НС) националних меншинох директорка Канцелариї за людски и меншински права Сузана Паунович.
Найвецей средства достаню совити найчисленших националних меншинох у Сербиї – мадярского 61 милион, бошняцкого 26,6 и ромского 22,1 милион динари.
За роботу НС Руснацох з републичного буджету опредзелєни 9 милиони 200 000 динари, цо скоро кельо и влонї, кед то було 9,3 милиони динари. У мено НС Руснацох на вчерайшей схадзки у Беоґрадзе присуствовал його предсидатель Славко Рац.
НС Словацох достанє 18,4 милиони, Румунох 13,3; Албанцох 13,1, а НС Горватох 13 милиони динари.
НС-ти Болгарох и Чарногорцох у 2016. року достаню по 7,7; Влахох 7,5, а НС-ти Бунєвцох и Македонцох по 7 милиони динари.
За свою роботу у тим року НС Українцох достанє 4,6 милиони динари, Нємцох и Словенцох по 4,1; Чехох 4, Єгиптянох 3,7; Ашкалийох и Грекох по 3,6, а Союз єврейских општинох Сербиї достанє 3,8 милиони динари.
