КОЦУР – Вилїя и Рождество Христово по юлиянским календаре у коцурскей грекокатолїцкей церкви Успения пресвятей Богородици преславене торжествено и шветочно. Всеночне на Вилїю, 6. януара, служене на 23 годзин, а вчера крачунски Служби Божо.
Всеночне служели коцурски парох и капелан о. Владислав Рац и о. Михайло Шанта, як и о. Яков Новак, а и попри барз нїзкей температури, церква була полна. През дзень и вечар пред Всеночним, по коцурских обисцох дзеци и млади ходзели по шпиваню и винчованю, було аж и штири традицийни вертепи, а коляди шпивали и гудаци.
Служби на Перши дзень Крачуна служел о. Яков Кулич, котри у казанї пречитал и Крачунску винчованку владики Георгия Джуджара.
Нєшка штирме священїки – о. Рац, о. Шанта, о. Кулич и о. Новак у службох буду мировац вирних, а после мированя, у вечаршей Служби крачунски шпиванки будзе шпивац Церковни хор Успения Пресвятей Богородици.
Попри грекокатолїкох, Крачун у Коцуре преславюю и православни вирни, та у дворе православней церкви на Вилїю, на 20 годзин, у присустве числених вирних традицийно запалєни бадняк, а палєнє бадняку провадзене з вельким огньометом.
