НОВИ САД – З нагоди означованя 23. октобра – Дня ошлєбодзеня Нового Саду у Другей шветовей войни, чолнїки Городу Нови Сад, делеґациї Войска Сербиї, Городского одбору СУБНОР-у и Резервних воєних старешинох положели венци на Спомин-теметове и на памятнїк Новосадского партизанскому одряду на Ченею.
У Городскей хижи отримана Шветочна академия на хторей городоначалнїк Нового Саду Милош Вучевич и предсидателька Скупштини Городу Нови Сад Єлена Црноґорац уручели Октоберски награди и Новемберски грамоти Городу Нови Сад за 2015. рок.
– Праве на нєшкайши дзень, Дзень ошлєбодзеня Нового Саду, символично и зоз заєднїцкима моцами придаваме апликацию за Европску престолнїцу култури 2021. року и прешвечени сом же шицки вєдно будземе промововац наш город и робиц на доставаню тей престижней титули – гварел городоначалнїк Вучевич.
Октоберску награду достали Коло сербских шестрох епархиї Бачкей за длугорочну гуманитарну роботу и промоцию идеї гуманосци и добродїйства, ЯКП „Городске желєнїдло” за дружтвено одвичательну роботу и промоцию гуманитарних активносцох, та културни роботнїк Исмет Атич за анґажованє у снованю културно-уметнїцких дружтвох и установох, у орґанизованю значних културних манифестацийох, оизначованю вилейох, шветочносцох и подобним.
Новемберску грамоту достали Стефан Веля, матурант Ґимназиї „Йован Йованович Змай” – наймладши добитнїк златней медалї з медицини на Шветовим салонє пренаходкох, виглєдованя и нових технолоґийох „Еурека” 2014. року у Бриселу, директор Городскей библиотеки Драґан Коїч за винїмкове доприношенє у очуваню културного идентитету Городу Нови Сад и Ґоран Црноєвич за вецей як 1 000 годзини волонтерскей роботи у помоци и потримовки дзецом хорим од рака.