СРИМСКА МИТРОВИЦА – Воскресне рано у парохиї Вознесения Господнього у Сримскей Митровици вчера почало з Воскресну утриню и Службу Божу з пошвецаньом паскох на 5 годзин, хтори служел парох о. Владислав Варґа, а друга Воскресна Служба Божа була на 11 годзин. У Латярку паски пошвецени на 9 годзин.
На шицких Службох у тей парохиї було вецей вирних як влонї, а пошвецени и вецей кошарки з пасхални єдзеньом, того року аж 95.
Як то по традициї, од покладаня плащанїци пияток, по воскресне рано внєдзелю при Божому гробу тримана стража, а стражу тримали млади.
На Вельку соботу, у парохийним доме професорка руского язика Моника Абодї Митрович и волонтере з Подручней канцелариї Националного совиту Руснацох отримали роботню писаня писанкох, на хторей участвовали 15-еро дзеци котри виучую руски язик.
У акциї Каритасу збераня помоци за дзеци широти пре войну у України вирни нашей парохиї у Сримскей Митровици назберали 40 180 динари.