ДЮРДЬОВ – Всоботу, 21. марца, у спортскей сали ОШ „Йован Йованович Змай” у Дюрдьове отримани перши турнир у рамикох тогорочних, 24. Спортских бавискох (СБ) „Яша Баков” – у кошарки „три на три”.
Змагали ше седем екипи – по два з Дюрдьова и Руского Керестура и по єдна з Вербасу, Нового Саду, док єдну екипу вєдно творели Шидянє и Бикичанє. Бавело ше по системи „кажде з каждим”.
Перше место освоєла екипа домашнього КУД „Тарас Шевченко 2” з 12 бодами, друге КУД „Тарас Шевченко 1” з 9 бодами, а треце место СД „Русин 1” з 8 бодами. Штварте место припадло екипи СД „Русин 2” з 5 освоєнима бодами, пияте заєднїцкей екипи КПД „Дюра Киш” зоз Шиду и КУД „Иван Котляревски” з Бикичу, зоз 4 бодами, шеста була екипа „Папивинґ” з Вербасу зоз 4 бодами, а седма „РКЦ Нови Сад”, без освоєного бода.
Домашнї турниру бул КУД „Тарас Шевченко”, у чиїх просторийох после змаганя було друженє, на хторим предсидатель СБ Яша Баков Звонко Салаґ и подпредсидатель Иван Папуґа шицким бавячом уручели дипломи, а побиднїком и медалї.