РУСКИ КЕРЕСТУР – У керестурскей парохиї св. оца Миколая вирни вчера преславели Перши дзень швета Рождества Христового – Крачун, а у нашим Еґзархату шветочно отворени и Святи рок – Рок милосердия.
Пред початком Архиєрейскей Служби Божей на 10 годзин преосвящени владика Георгий, у присустве 12 священїкох з наших парохийох и церковного общества, отворел главни дзвери на Катедралней церкви.
З тим чином символично отворени Рок милосердия, до хторого владика и шицки присутни вошли уходзаци през тоти дзвери до церкви. З потребнима условиями, тот чин принєсол подполни одпуст, а як владика потолковал у казанї – у Святим року го мож окончиц и вецей раз.
Попри Катедрали св. оца Миколая, за вирних нашого Егзархату одпустове место у тим Святим року будзе и Марийово святилїще Водица.
По уходзе до Катедрали владика зоз священїками предводзел Крачунску литурґию, хтору возвеличал и домашнї Хор, под руководительством Лидиї Пашо.
У казанї владика домашнїм парохияном и їх госцом повинчовал Крачун, та визначел же Рождество Христово вирних вше ознова здогадує на вельку Божу любов ґу чловекови.
По Служби предсидатель Националного совиту (НС) Руснацох Славко Рац, його заменїк Йовґен Мудри, подпредсидателє НС Наташа Еделински и Микола Шанта, як и предсидатель Вивершного одбору Совиту Желько Ковач, владикови Георгийови и священству на парохиї повинчовали Крачун и Нови рок.
Традицийно, Крачун на Перши дзень владикови и керестурским священїком повинчовали и члени Церковного одбору и керестурского Мишаного хору Дому култури и Катедралней церкви св. о. Миколая.
Нєшка, на Други дзень Крачуна, Служби Божо на 8, 10 и 17 годзин, а на ютре у шицких службох будзе и мированє.
Служби на Треци дзень Крачуна у Керестуре буду на 8, 10, 11,30 и 17 годзин, а на 15 годзин Служба будзе и у манастире Исусових малих шестрох на Циґлашоре.
