На Покраїнску смотру дзевецеро нашо рецитаторе

автор зам
1.1k Опатрене

БАЧ – На Покраїнску смотру рецитаторох пласовали ше дзевецеро з єденацецерих котри у трох возростох рецитовали по руски на Зонскей смотри у Бачу, отриманей 21. и 22. марца.

Всоботу, 21. марца змагали ше рецитаторе младшого и штреднього возросту, а з рецитациями по руски участвовали Милица Михальовски з Дюрдьова и Минеа Югас и Микола Еделински з Руского Керестура, и шицки тройо ше пласовали на Покраїнску смотру.

У штреднїм возросту змагали ше шесцеро нашо рецитаторе, а на Покраїнску смотру ше пласовали Валентина Михняк з Дюрдьова, Марко Недич з Коцура и Желько Виславски и Тимеа Будински з Керестура. Попри спомнутих, на Зонскей смотри участвовали и Валентина Салаґ з Дюрдьова и Матей Шепински з Керестура.

Внєдзелю, 22. марца, у конкуренциї старшого возросту змагали ше Николета Недич з Коцура и Мирослав Малацко з Керестура, и обидвойо ше пласовали на покраїнске змаганє.

Рецитаторох за змаганє пририхтали Ивана Дудаш и Мелания Рамач у Керестуре, Мария Самарджич и Яким Гарди у Дюрдьове и Весна Дїлас у Коцуре.

Рецитаторе з трох бачких округох на Зонскей смотри у Бачу рецитовали по сербски, словацки, мадярски, руски и по горватски, а оценьовала их фахова комисия у составе Ґордана Дюрдєвич Димич, односно Миодраґ Петрович, Михайло Зазуляк, Ана Лесковац и Мелинда Ладишич.

Покраїнска смотра рецитаторох будзе отримана у Сечню од 24. по 26. април.

 

ПОВЯЗАНИ ТЕКСТИ