На пондзелок вистава фотоґрафийох

автор ядю
596 Опатрене

НОВИ САД – Вистава як резултат проєкта „ Културне нашлїдство през мой обєктив”, котри реализовал Завод за културу войводянских Руснацох зоз финансийну потримовку Фондациї „Нови Сад 2021 – Европска престолнїца култури”, будзе отворена на пондзелок, 22. априла, на 18 годзин у просторийох ОПЕНС-а, Лази Телечкоґ 2 у Новим Садзе.

У проєкту участвовали 17-еро штредньошколци представителє бунєвацкей, влашскей, ромскей, рускей, сербскей и ческей националней меншини. У рамикох того проєкту присуствовали на двох стретнуцох под час котрих орґанизовани вецей интерактивни преподаваня и роботнї о културним нашлїдстве, интеркултуралносци и фотоґрафиї, и медзисобно упознали и представели свойо национални заєднїци. На вистави буду виложени 42 фотоґрафиї на тему културного скарбу.

През проєкт „Културне нашлїдство през мой обєктив” намагало ше вибудовац активне одношенє младих ґу институцийом култури през їх участвованє у културних збуваньох и розвою будуцей публики.

После Нового Саду вистава будзе представена и у Билей Церкви, Суботици и Кучеву,  одкаль авторе фотоґрафийох.

ПОВЯЗАНИ ТЕКСТИ