РУСКИ КЕРЕСТУР – Медзинародни волонтерски камп „Summer in Ruski Krstur 2016” („Лєто у Руским Керестуре 2016”), хтори ше уж роки отримує у Керестуре – почина на пондзелок, 4. юлия, и будзе тирвац по 17. юлий.
На Кампу участвую волонтере з Французкей, Нємецкей, Турскей, Горватскей, волонтере зоз Сербиї и Керестура, а орґанизаторе поволую заинтересованих же би ше приявели, понеже ище вше єст места.
У керестурским Оддзелєню „Цицибан” ПУ „Бамби” волонтере буду з дзецми ушорйовац заградки, а у Водица єй просториї и фарбиц слупи на Крижней драги. На теметове волонтере буду фарбиц ограду, односно доконча роботу хтору започали прешлорочни волонтере, а на базену буду фарбиц рукохвати, драбинки и ограду.
Окрем роботней часци, акцент Волонтерского кампу того року будзе на представяню мултикултуралносци у Войводини през традицийни єдла пейцох народох- Руснацох, Мадярох, Словацох, Українцох и Сербох, а окрем лидерки Кампу Дорис Бучко, у тей часци з волонтерами будзе робиц и Любица Няради.
Волонтерски камп орґанизує Туристичне здруженє „Руски Керестур”, а з финансийну потримовку Роботного цела за младеж Националного совиту Руснацох и Општини Кула. Камп и того року будзе мац вельку потримовку од Каритасу, Месней заєднїци Руски Керестур и ЯКП „Руском”.
У витворйованю каждого Волонтерского кампу вельку учасц ма и локална заєднїца, та орґанизаторе поволую шицких котри то можу же би подаровали єдзенє за костиранє волонтерох.
За приявйованє на Камп, лєбо помоц у поживових артиклох, мож ше явиц Дорис Бучко, на число телефону 062/88 97 128.
