НОВИ САД – На вчерайшей шветочней академиї з нагоди означованя 70-рочнїци виходзеня новинох, НВУ „Руске слово“ привитало госцох з державних и покраїнских орґанох, з Амбасади України у Сербиї, представительох снователя – Националного совиту Руснацох, представительох Апостолского еґзархату, локалних самоуправох у хторих жию припаднїки нашей заєднїци, дакедишнїх „рускословцох”, колеґох з других медийох, як и представительох руских установох и здруженьох, а окреме вирних читачох.
У пригодней културней програми участвовали нашо найуспишнєйши рецитаторе – Валентина Михняк з Дюрдьова и Мирослав Малацко з Руского Керестура, а з музичнима точками наступели пияниста и композитор Владимир Малацко з Руского Керестура и шпивачка Саня Полдруги з Коцура, котру на ґитари провадзел Мирослав Пап з Нового Саду. Слово о уметнїкох чийо музични албуми самостойно, лєбо як совидаватель, обявела НВУ „Руске слово”.
Конферансу на шветочносци водзела колеґиня з РТВ Марина Сабадош.
