На соботу порядна схадзка Националного совиту

автор зам
898 Опатрене

РУСКИ КЕРЕСТУР – На соботу, 12. септембра, у Руским Керестуре будзе отримана пията порядна схадзка Националного совиту (НС) Руснацох. Схадзка будзе у просторийох Совиту у Замку на 10 годзин.

На дньовим шоре 22 точки, медзи нїма и хтори ше одноша на финансийне дїлованє Совиту и Заводу за културу войводянских Руснацох, та одредзени кадрово питаня, понеже будзе констатоване задзекованє єдного члена НС, мали би буц меновани, односно предложени члени управних одборох НВУ „Руске слово” и Дому култури Руски Керестур, та дате думанє о систематизациї роботних местох у Заводзе за културу войводянских Руснацох.

Совит би на соботу мал потвердзиц вецей одлуки свойого Вивершного одбору (ВО) о датих предкладаньох и думаньох на проєкти хтори з нашей заєднїци сцигли на конкурси Министерства култури и информованя, Покраїнского секретарияту за културу и явне информованє, Городу Нови Сад, та о розподзельованю средствох на основи конкурсу за дотациї орґанизацийом етнїчних заєднїцох у АП Войводини. Совит би мал потвердзиц и одлуку ВО о предходно датей согласносци за вибор директора ОШ „Чаки Лайош” у Бачкей Тополї.

На дньовим шоре схадзки и информациї о можлївосцох предаваня квартелю НС у Новим Садзе, о розришованю маєтно-правних одношеньох над будинком у улїци Йована Суботича 8 у Н. Садзе, та о отриманей Лєтнєй школи НС.

За соботову схадзку НС предложене и прилапйованє вименкох Правилнїка о додзельованю стимулацийох и наградох у форми стипендийох, та Правилнїка о канцеларийним и архивним дїлованю.

Тиж буду розпатрани заключеня з концом авґуста отриманей заєднїцкей схадзки одборох и представительох подручних канцеларийох НС, дата информация о формованю музейней збирки Руснацох, як и звит з одходу делеґациї НС до Свиднїку, у Словацкей.

 

ПОВЯЗАНИ ТЕКСТИ