РУСКИ КЕРЕСТУР – У Руским Керестуре на соботу, 5. децембра, будзе отримана шеста порядна схадзка Националного совиту (НС) Руснацох у тим зволаню. Схадзка будзе на 10 г. у просторийох Дому култури.
Нєшка дополадня у Новим Садзе будзе ище єдна схадзка Вивершного одбору НС, як пририхтованє за соботове зашеданє, а на своєй шестей схадзки, НС констатує и мандат свойому новому членови.
Пред членми НС на соботу будзе прилапйованє Плану роботи и Финансийного плану Совиту за 2016. рок, як и даванє думаня о вименки Финансийного плану Заводу за културу войводянских Руснацох (ВР) за тот рок, та даванє думанє о Програми роботи и Финансийним планє Заводу за наступни рок. На дньовим шоре схадзки и даванє согласносци на План роботи и Финансийни план НВУ „Руске слово” за 2016. рок, як и приношенє Одлуки о вименки Одлуки о снованю НВУ „Руске слово”.
НС би на соботу перше мал розришиц, а потим и меновац нових членох до Управного (УО) и Надпатраюцого одбору (НО) Заводу за културу ВР, як и до УО и НО Руского народного театру „Петро Ризнич Дядя”, та меновац члена до УО НВУ „Руске слово” з представительох занятих.
На дньовим шоре и починанє явней розправи о додзельованю припознаньох визначним Руснацом за їх доприношенє рускому народу, та потвердзованє вецей одлукох принєшених на ВО НС.