РУСКИ КЕРЕСТУР – На своєй вчерайшей схадзки, Управни одбор (УО) Дому култури Руски Керестур за директора тей установи вибрал Йоакима Раца Мимия, котри и дотераз окончовал тоту финкцию.
На Явни конкурс за директора Дому култури, хтори бул розписани 16. новембра, сцигли прияви двох кандидатох – дотерашнього директора, хореоґрафа Йоакима Рац и Владимира Малацка, котри од юния 2005. по април 2012. року бул окончователь длужносци директора керестурского Дому култури, явносци познати и як композитор и музичар. Обидвоме кандидати з Керестура.
На схадзки УО присуствовали шицки седем члени и о виборе директора одлучоване з явним гласаньом. Йоаким Рац достал штири, а Владимир Малацко три гласи.
Одлука, односно предлог за вибор Раца за директора Дому култури будзе послата сновательови – Општини Кула на менованє. Пред менованьом, снователь о кандидатови за директора муши достац думанє Националного совиту Руснацох, понеже Дом култури Руски Керестур преглашена за установу од окремного значеня за Руснацох.
Терашнї мандат Йоакимови Рацови виходзи 16. януара 2016. року.