На Шветочним концерту и Чамови на чесц

автор сен 
1.1k Опатрене

РУСКИ КЕРЕСТУР – Наш найстарши и найвекши Фестивал рускей култури „Червена ружа” вчера закончени з богатим и квалитетним Шветочним концертом „На штред широкей ровнїни”, на хторим наступели доберани ансамбли з наших местох и госцуюци ансамбл Сербского културно-уметнїцкого дружтва (СКУД) „Святи Сава” зоз Шиду.

Дом култури Руски Керестур (ДКРК) ше на Шветочним концерту представел з шейсцома секциями, хтори виведли шейсц шпиванки и два танци – Мишани хор ДКРК, под дириґентску палїчку Лидиї Пашовей одшпивал штири композициї, по два Хлопска жридлова ґрупа и Дзивоцка шпивацка ґрупа, чий фахови руководитель бул Юлиян Рамач Чамо, а за наступ их пририхтал Мирон Сивч, док Виводзацки фолклорни ансамбл виведол хореоґрафию „Вчера вечар на валалє”, хореоґрафки Ґабриєли Саянкович, а у програми участвовал и Танєчни ансамбл ветеранох. Шицких провадзел Вельки народни оркестер Дому култури, тераз под руководительством Сашу Палєнкаша и Мирона Сивча.

На Шветочним концерту ше з одличнима хореоґрафиями представели и Дюрдьовчанє – танєчни ґрупи Културно-уметнїцкого дружтва „Тарас Шевченко” виведли два танци – „Пред нашима дзверми” и Закарпатски танци,  хореоґрафох Звонка Барну и  Миколу Хромиша, док новосадски Руски културни центер представяла його Хлопска шпивацка ґрупа з трома шпиванками, под фаховим руководительством Борута Павлича и Михайла Колесара.

Окреме упечатлїве було законченє того „руского блоку” на Шветочним концерту, кед оркестер, шпивацки и танєчни ґрупи ДКРК виведли длугшу точку „Чамови на чесц”, составену з найоблюбенших танцох и шпиванкох Юлияна Рамача Чаму. Публика з емоциями и длугим аплаузом подзековала Чамови, а точку барз емотивно дожили и єй виводзаче. Тот сценски приказ обдумала Ґабриєла Саянкович, а шицки присутни ше на подобу, роботу и шлїд хтори у нашей култури за собу зохабел Юлиян Рамач Чамо здогадли и прейґ пригодних словох конферанси.

Шветочни концерт, та и тогорочни Фестивал рускей култури закончени з наступом госцуюцого ансамблу СКУД „Святи Сава” зоз Шиду, чийо члени барз успишно виведли репертоар шпиванкох и танцох зоз Сриму и Сербиї.

Руководителє манифестациї „На штред широкей ровнїни” були Йоаким Рац и Михайло Зазуляк, котри написал и конферансу, а водзели ю Адриана Надь и Андрей Орос.

(Вецей фотоґрафиї зоз Шветочного концерту будзе у окремней ґалериї на правим боку сайту „Руского слова” и Рутенпресу).

ПОВЯЗАНИ ТЕКСТИ