РУСКИ КЕРЕСТУР – Всоботу у керестурским Ресторанє „Червена ружа” отримани ювилейни, 10. Паприґарски бал, хтори бул окреме весели и тирвал до рана. З пригоднима змистами орґанизаторе – пейц керестурски паприґарски фамелиї – наглашели його ювилейну ноту, цо тиж допринєсло доброму розположеню 220 госцом на Балє.
Приказана ретроспективна вистава фотоґрафийох з балованя паприґарох за остатнї 10 роки, а за „родзени дзень” Балу була и велька торта з огньометом.
На Балє було и числени забавни и франтовни змисти и танци, модератор вечара бул предсидатель Здруженя паприґарох Владимир Варґа, а госцох забавял оркестер „Мих шоу бенд”.
Орґанизаторе сами и од спонзорох обезпечели прейґ 200 вредни томболи, а найвреднєйша була седемдньови одпочивок у Врнячкей Банї за два особи, хтори достали Мария и Янко Макайово, ТВ-приємнїк достал Янко Планчак Бобек, шедзацу гомбалку Михал Джуджар, а моторчок за залїванє Михайло Тиркайла.
О популарносци Паприґарского балу шведочи и податок же, як то було и на скорейших, и на тогорочним Балє присутни госци резервовали уходнїци за Бал 2016. року.
