МУКАЧОВ (УКРАЇНА) – На ютре, 7. мая, у Мукачове у України будзе означени Дзень Русинох на Подкарпатю (Закарпатю). За Дзень Русинох на Подкарпатю тамтейши русински орґанизациї – членїци Шветового конґресу Русинох/Руснацох/Лемкох (РРЛ) одредзели 24. април, дзень народзеня Александра Духновича, алє пре Квитну нєдзелю, потим и Вельку ноц по юлиянским календаре, того року Дзень Русинох будзе означени 7. мая.
Шветочна програма, на хторей участвую музични и фолклорни ґрупи, на ютре пополадню будзе у Мукачовским драмским театру, а на нєй будзе додзелєна и новозапровадзена литературна награда з меном нєдавно упокоєного писателя Ивана Петровция.
На Дню Русинох буду присуствовац и члени Шветовей ради РРЛ, медзи нїма и Дюра Папуґа з Руского Керестура, як и представителє Рускей матки.