РУСКИ КЕРЕСТУР – На инициятиву Комисиї за воду Еколоґийного руху „Желєни персцень” з Руского Керестура, на чолє з др Леону Доротич Ґутеша, у просторийох Месней заєднїци 3. марца отримана ище єдна схадзка у напряме намаганя за тирваце ришенє проблему з нєисправну воду за пице у Керестуре.
Предсидателька Управного одбору „Желєного персценю”, примариюс мр Лилияна Соколова, присутним виложела информацию же подобни проблем з воду добре розришени у Сенти, так же окремна делеґация 9. марца пойдзе до Сенти и на самим месце ше упозна з тим ришеньом.
Попри мр Соколовей и др Доротич Ґутешовей, у делеґациї буду и покраїнски посланїк Славко Рац, заменїк началнїка Општинскей управи Стєпан Вакула, директор ЯКП „Руском” Иґор Фейди, о.д. секретара МЗ Юлиян Медєши и Велько Сузич зоз Зомбора, фахови консултатн за проєктантску компанию СИД.
На схадзки у Керестуре, попри горе спомнутих, присуствовали и предсидатель Совиту МЗ Владимир Олеяр, о. Михайло Малацко, предсидателє здруженьох рибарох и ловарох Янко Джуджар и Михайло Надь як члени стаємней Комисиї за воду керестурского Еколоґийного руху и директорка Школи „Петро Кузмяк” Хелена Пашо Павлович.