Нови руски кнїжки на Сайме у Беоґрадзе

автор М. Шанта
518 Опатрене

НОВИ САД – У рамикох тогорочного Сайму кнїжкох у Беоґрадзе НВУ „Руске слово”, наютре на 12 годзин представи свою нову продукцию, як и даєдни кнїжки хтори обявени влонї. Рускословски кнїжки буди представени у сали „Борислав Пекич” на штанду Покраїнского секретарияту за културу, явне информованє и одношеня з вирскима заєднїцами.

На Сайму буду предстевни кнїжки зоз тогорочней продукциї – кнїжка поезиї Славка Романа Ронду „Одняти од псох”; вибрани огляди и портрети „Руснаци” (том II) Дюру Латяка; писнї за дзеци Ирини Гарди Ковачевич „За главки у лавки”; писнї и приповедки за дзеци Силвестера Д. Макая „Боси по праху”; поуки за дзеци и старших Юлияна Тамаша „Їжик голик” и зборнїк литератури младих 2010-2020 „Дзеци з дружтвених мрежох”.

Кнїжки хтори обявени влонї, а нє представени су потераз на Сайме то драми Звонимира Павловича „Зазбероваче труплох” и кнїжка интервюох Олени Планчак Сакач „Вецей од бешеди”.

О кнїжкох буду бешедовац редакторе и рецензенти, а поволани шицки нашо читаче же би свою нащиву Сайму у Беоґрадзе виплановали за тот дзен и нащивели наш штанд.

Сайму ше на тим истим штанду на 13 годзин представи и Завод за културу войводянских Руснацох зоз виданями „Руснаци од присоєдинєня по Просвиту” автора др Дюру Гардия и „Зборнїк роботох зоз 4. Науковей конференциї младих науковцох и фаховцох” о котрим будзе бешедовац Саша Сабадош, єден з редакторох.

ПОВЯЗАНИ ТЕКСТИ