НОВИ САД – Того року у Новим Садзе отворени два нови дзецински заградки, два добудовани, та до новосадских дзецинских заградкох уписани аж 16 000 дзеци, гварел за Радио-телевизию Сербиї городоначалнїк Милош Вучевич. Звекшане числа дзецох твори одредзени прицисок коло їх упису, алє з тим ше треба цешиц, понеже то значи же Нови Сад рошнє, наглашел Вучевич.
Вон наведол же Город Нови Сад субвенционує пребуванє 1 700 дзецох у приватних оводох, пре нєставанє лїстинох за чеканє, а визначел и же би за розвой Нового Саду було значне доставанє титули Европскей престолнїци култури 2021.
– Вєдно з визначнима установами култури, як цо Матица сербска, Сербски народни театер, фестивалами Еґзит, Номус и другима, Нови Сад роби на тей инициятиви, а значне и тото же Нови Сад у узшим виборе за доставає титули Младежскей престолнїци Европи за 2018. рок – гварел Вучевич.
Отверанє нових роботних местох тераз приоритет городскей администрациї, а Вучевич гварел и же Город Нови Сад за таки активносци ма потримовку и од премиєра Сербиї и його Кабинету.