НОВИ САД – Нови Сад придал конєчну апликацию за кандидованє за Европску престолнїцу култури 2021. року, а з тей нагоди член Городскей ради за културу Далибор Ружич и предсидатель Орґанизацийного одбору „Нови Сад 2021” Неманя Миленкович отримали конференцию за новинарох.
Миленкович визначел же „Нови Сад 2021” проєкт шицких Новосадянох, а чи и будзе Европска престолнїца култури оценя члени Панелу нєзависних фаховцох з обласци култури, котри до Нового Саду приду 29. септембра. Конєчна одлука будзе обявена 13. октобра у Бриселу.
Же доставанє титули Европскей престолнїци култури 2021. року значне за Нови Сад указую и рижни активносци обєдинєни у Стратеґиї културного розвою Нового Саду, хтора нєдавно прилапена.
Конференция була и нагода за представянє резултатох виглєдованя аґенциї „Нинамедиа”. Спомедзи 1 202 випитаних жительох, 73,5 одсто дума же Нови Сад город култури, 18,5 одсто о тим нє ма думанє, а 7,8 одсто ше з тим нє склада. Векшина Новосадянох дума же Нови Сад може достац титулу Европскей престолнїци култури за 2021. рок, а єст и таких котри думаю же за ню потребни вельо вецей укладаня як цо то Нови Сад може обезпечиц.