НОВИ САД – Город Нови Сад поднєсол кандидатуру за Младежску престолнїцу Европи 2018. року, у сотруднїцтве з верховну орґанизацию Млади Сербиї и Националну асоцияцию практичарох и практичаркох младежскей роботи.
Европска престолнїца младих єднорочна титула, хтора єден город представя як престолнїцу младежи зоз шицкима змистами и програмами з обласци дружтвеного, културного, економского и политичного живота младих.
Як на промоциї кандидованя гварел член Городскей ради задлужени за младих Предраґ Свилар, Нови Сад ма длугу традицию як формалного, так и нєформалного орґанизованя младих, а остатнї таки приклад то популарни фестивал Еґзит, чийо представителє потримали тоту кандидатуру и буду участвовац у єй промоциї.
Партнере Городу у тим кандидованю младежски и студентски орґанизациї и здруженя, а предсидатель Управного одбору Еґзит фондациї Неманя Миленкович поволал на сотруднїцтво шицки младежски орґанизациї хтори маю квалитетни, креативни и ориґинални идеї, же би були часц тиму хтори витвори проєкт „Нови Сад младежска престолнїца 2018. року.”