Новорочни коктел Совиту МЗ Дюрдьов

автор ртв
911 Опатрене

ДЮРДЬОВ – Совит Месней заєднїци Дюрдьов пияток, 25. децембра орґанизовал новорочни коктел, на хторим присуствовали представителє валалских установох, институцийох, здруженьох, политичних странкох и општинскей власци.

Як гварела предсидателька Совиту Месней заєднїци Дюрдьов Леона Виславски, сход орґанизовани же би ше зишли и вичерали искуства шицки цо зоз свою роботу доприноша розвою валалу. Вона визначела же Совит, и попри своїх скромних средствох (лєм зоз закупу даєдних обєктох), того року помагал роботу здруженьох, а назберани и пенєж за ушоренє простору дакедишнєй Матки.

Спомнути простор у задружним будинку од приватизованя у судским спору, а член Општинскей ради задлужени за капитални укладаня Боро Милич визначел же Општина Жабель роби на тим же би ше будинок одкупело од терашнього власнїка и адаптовало за потреби валалу. Милич гварел и же шлїдуюцого року буду предлужени роботи на канализацийней мрежи, за цо уж обезпечени 201 милион динари з Покраїни.

У идуцим року плановане и законченє Еко-студнї, копанє яркох за одводзенє атмосферских водох, вибудов паркинґу у центру валалу, ожелєньованє места и його околїска и друге.

Присутни зауважели же ше до Дюрдьова мало уклада, а як причину наведли же валал нє ма свойого представителя у Општинскей ради.

7-Djurdjov-02

ПОВЯЗАНИ ТЕКСТИ