Нєзадовольни просвитаре вчера нє отримовали годзини

автор сен
1.1k Опатрене

СЕРБИЯ – Векшина школох хтори членїци Униї синдикатох просвитних роботнїкох (УСПР) и Синдикату роботнїкох у просвити Сербиї (СРПС) вчера, 23. марца радикализовали штрайк, та у нїх вообще нє було настави. Як наведол предсидатель УСПР Драґан Миятович, просвитни роботнїки нєзадовольни прето же даєдним котри штрайкую фебруарска плаца зменшана за до 33 одсто, даєдни ю ище анї нє достали, док дзепоєдним плаци остали исти, преноши Бета.

Министер просвити Срдян Вербич послал допис директором школох хтори штрайкую же би зменшали плаци роботнїком, та зменшованє плаци завиши од директорох и школских управох. Миятович гварел же просвитни роботнїки котри нє достали плаци вироятно анї нєшка нє буду отримовац годзини, а найвецей их єст у Чачку, Ґорнїм Милановцу и Крушевцу.

Министер Вербич винєсол податок же вчера у 22 одсто школох у Сербиї нє було настави, а надпомнул же вимоги просвитарох котри штрайкую нє по закону, та их поволал най ше поинформуюи о пошлїдкох штрайку.

Началнїк Школскей управи Нови Сад Петар Видїкант за РТВ гварел же будзе вельки проблем и кед у коло 70 одсто школох була порядна настава, а у коло 30 одсто були скрацени годзини, прето же приходзи до нєровноправносци медзи школярами.

Странки опозициї у Скупштини Сербиї предсидательки Народней скупштини придали вимогу же би ше о проблему просвитних роботнїкох бешедовало на схадзки Скупштини, на хторей би присуствовали и шицки штири синдикати и министрове у Влади Сербиї.

ПОВЯЗАНИ ТЕКСТИ