НОВИ САД – З Републичней до покраїнскей каси треба цо скорей преруциц 4,4 милиярди динари, а кед до того нє придзе, будзе ше робиц ребаланс покраїнского буджету, та велї проєкти хтори финансує Покраїна останю без значних средствох – гварел вчера покраїнски секретар за финансиї Зоран Радоман.
Република по законе нє обовязна виплациц тот пенєж, алє понеже ше 7 одсто з буджету хтори ґарантовани з Уставом нє виплацує кажди рок, Войводина розполага зоз 40 милиярди динари менєй.
Як гварел Радоман, понеже премиєр Александар Вучич и министер финансийох Душан Вуйович наглашую же буджет Сербиї у добрей позициї, нєт економски причини же би Войводина нє достала тот пенєж.
– Медзитим, гоч каждодньово доставаме информациї о добрим стану републичних финансийох, нє доставаме и информацию цо будзе з нашу вимогу и випатра же тот пенєж нє достанєме – гварел Радоман.