БЕОҐРАД – Векшина новинарох и других занятих у 74-ох локалних и державних медийох нє годни достац безплатни акциї хтори ше будзе дзелїц кед ше за їх медий нє найдзе купец.
Гоч закон предвидзує же кед медийна хижа нє будзе предата по 1. юлий роботнїком акциї буду подаровани, Влада принєсла уредбу спрам хторей власнїки свойого роботного места годни постац лєм тоти новинаре и други заняти котри дотераз нє уписали безплатни акциї за, нпр. Аеродром, НИС и друге. Понеже коло 4, 8 милиони полнолїтни гражданє уписали безплатни акциї, медзи нїма и векшина новинарох.
На тот способ велї медийни хижи хтори нє достаню правих купцох знова приду до рукох держави, преноша „Новосци”. Будзе одредзене число акцийох, малочислени заняти достаню акциї спрам рокох роботного стажу, а шицко цо останє буду акциї Републики Сербиї у Акцийним фонду. З нїма ше нє тарґує, бо слово о завартим дружтве, та держава предлужи ґаздовац з медиями и попри тим же законски „ма висц з медийох”.
– Кед до того придзе, Закон о медийох и информованю будзе подполно потупени у важней часци, а приповедка о безплатним дзелєню акцийох занятим подполно би препадла – гварел Нино Брайович зоз Здруженя новинарох Сербиї, надпоминаюци же би и Влада и Скупштина мали дац автентичне толкованє Уредби и Закона, же би ше знало правила.
Же будзе огранїченя у дзелєню акцийох потвердзел и державни секретар у Министерстве култури и информованя Саша Миркович. Вон гварел же медийне совласнїцтво годни достац гражданє котри дотераз нє уписали безплатни акциї.