Нєшка Вивершни одбор Националного совиту

автор зам
815 Опатрене

НОВИ САД – У Заводзе за културу войводянских Руснацох нєшка, 2. септембра, будзе штварта порядна схадзка Вивершного одбору (ВО) Националного совиту (НС) Руснацох. Схадзка почнє на 13 годзин.

На дньовим шоре предкладанє точкох дньового шору за наступну схадзку НС, медзи нїма констатованє задзекованя єдного члена НС, вименка Финансийного плану НС за тот рок и вибор ревизиї финансийного дїлованя Совиту, та даванє думаня о вименки Финансийного плану Заводу за културу войводянских Руснацох.

ВО за схадзку НС предложи и потвердзованє вецей своїх одлукох з хторима предложел, одлучел, лєбо дал думанє о софинансованю проєктох з нашей заєднїци хтори сцигли на конкурси Покраїнского секретарияту за културу и явне информованє, Министерства култури и информованя, Городу Нови Сад, та на други конкурси.

На дньовим шоре схадзки ВО и предлог за менованє члена Управного одбору (УО) НВУ „Руске слово” зоз шорох занятих и УО Дому култури Руски Керестур спред НС, питаня вязани за квартель НС у Новим Садзе, та информация о розришованю маєтно-правних одношеньох над будинком на адреси Й. Суботича 8 у Новим Садзе (РКЦ).

Вименка Правилнїка о додзельованю стимулацийох и наградох у форми стипендийох, информация о отриманей Лєтнєй школи, заключеня з прешлого тижня отриманей заєднїцкей схадзки одборох и представительох подручних канцеларийох НС тиж буду теми на нєшкайшей схадзки, як и розпатранє Правилнїка о архивованю и информациї о можлївосци снованя музейней збирки Руснацох, та дзепоєдни други питаня.

ПОВЯЗАНИ ТЕКСТИ