РУСКИ КЕРЕСТУР – У орґанизациї младих зоз Здруженя „Пакт Рутенорум” нєшка, 26. новембра, у Велькей сали Дому култури Руски Керестур будзе 19. Мултимедиялна програма младих „Дньовка”, з хтору будзе закончена и тогорочна 23. Културна манифестация „Костельникова єшень”.
„Дньовка” почнє на 21 годзин, а на програми участвую млади з Руского Керестура, Нового Саду, Дюрдьова и Зомбора з танцами, музику, поезию и прозу.
Пре евентуални нєприкладни змисти, орґанизаторе нє препоручую же би на програму пришли дзеци младши од 13 роки, цо наглашели и на плакатох.
У голу Дому култури буду виложени и осем фотоґрафиї хтори сцигли на тогорочни конкурс за авторски фотоґрафиї з тему „Бунт”, як и вистава „Приватни живот Руснацох” автора Сашу Сабадоша.
Тогорочна Културна манифестация „Костельникова єшень” почала 18. новембра, векшином була пошвецена представяню найновших кнїжкох у виданю НВУ „Руске слово”, а єй програми отримани у Руским Керестуре, Кули, Дюрдьове и Коцуре.