ПЕТРОВЦИ (ГОРВАТСКА) – На 43. централней манифестациї култури Руснацох Горватскей „Петровски дзвон”, хтора у Петровцох почала вчера, нєшка на 18,30 г. у Етноґрафскей збирки буду отворени три вистави – иконох о. Михайла Гардия з Метлики, зоз Словениї, древорезох Йовґена Сопку з Петровцох и сувенирох Михайла Панковича з Пишкуревцох.
У Сали за схадзки на 19 г. почнє представянє трох кнїжкох – „Страданє Руснацох у Отечественей войни 1991/92” Миколу Папа, „Цихосц умера на дланю” Владимира Провчия и алманаху „Думки з Дунаю” ґрупи авторох.
На 20 г. будзе отримани Музично-литературни вечар руских писательох з Горватскей, хтори того року пошвецени 185-рочнїци приселєня Руснацох до Петровцох и Горватскей, 180-рочнїци грекокатолїцкей парохиї у Петровцох и 45-рочнїци часопису „Нова думка”. У знаку тих ювилейох отримує ше цали тогорочни фестивал.
На ютре, 5. юния, после кладзеня венцох на памятнїк и Служби Божей (на 10 г.) у грекокатолїцкей церкви, на 11 г. почнє манифестация дзецох „Петровски дзвончок”, на хторей участвую дзецински ансамбли з Вуковару, Петровцох, Миклошевцох, а як госци мадярски дзецински ансамбл КУД „Петефи Шандор” з Ласлова и словацки Матки словацкей з Илоку.
На 13 г. почнє смотра музично-фолклорней творчосци Руснацох у Горватскей „Петровски дзвон”, на хторей участвую ансамбли з Риєки, Заґребу, Винковцох, Райового Села, Осиєку, Вуковару, Петровцох и Миклошевцох, а як госци наступя и Руснаци зоз Сербиї – КУД „Петро Кузмяк” з Нового Орахова, та горватски ансамбл „Етно-голубица” з Винковцох и ансамбл Здруженя Мадярох „Стари Янковци” з истоменого места.
Як дознава Рутенпрес, нєдзельово програми на „Петровским дзвонє” будзе провадзиц и делеґация Националного совиту Руснацох зоз Сербиї.