СУБОТИЦА – Бунєвска матка, Фриске Академия з Голандиї и Бунєвски европски центер з Голандиї нєшка и на ютре у Суботици орґанизую Медзинародни експертски семинар з назву „Язики хторим грожи опасносц од нєставаня и диґитализованє едукативного материялу за образованє националних меншинох”.
Нєшка, 24. новембра, на Семинаре будзе розправянє о „Язикох хторим грожи опасносц од нєставаня”, дзе буду спатрени европски искуства, можлївосци и способи охрани таких язикох, як и проблеми и искуства националних меншинох у Сербиї, чиїм язиком грожи опасносц од вимераня.
Як наявене, медзи фаховцами за язики котри нєшка буду викладац реферати винєшу и проф. др Михайло Фейса и академик Юлиян Тамаш, за руски язик.
На Семинаре буду викладац фаховци за загрожени язики з Голандиї, линґвиста з Портуґалиї, як и фаховци за дзепоєдни язики меншинох у Сербиї – словацкей, бунєвскей, єгипетскей, шокецкей и ромскей националней меншини, та о сербским, як язику националней меншини у Мадярскей.
На ютре Семинар пошвецени диґитализованю едукативного материялу за образованє националних меншинох.
Семинар будзе отримани у просторийох Бунєвскей матки (Корзо 8), обидва днї почина на 10 г., а як дознава Рутенпрес, на нїм буду присуствовац и предсидатель и заменїк предсидателя Рускей матки Дюра Папуґа и Миломир Шайтош, котри нєшка буду мац стретнуце з предсидательом Бунєвскей матки Иваном Седлаком.