НОВИ САД – Нєшка на 10 годзин у Новим Садзе будзе отворена нови будинок дзецинскей заградки Предшколскей установи (ПУ) „Радосне дзецинство“, а як гварели з тей установи, до нєй уписани 270 дзеци, котри буду розподзелєни до 20 воспитних ґрупох.
Будованє того обєкту у Роботнїцкей улїци почало ище 2011. року, алє закончуюци роботи на вецей заводи прекладани пре нєдостаток пенєжу. Член Городскей ради задлужени за образованє Владимир Єлич гварел же з отвераньом нового будинку будзе зменшана лїстина чеканя дзецох за приєм до дзецинскей заградки, а по законченю роботох на обєктох у Ветернику и Петроварадину, тей лїстини вецей анї нє будзе.
Медзитим, ПУ „Радосне дзецинство“ ше зочує з нєдостатком кадрох, та дзецински заградки у Ветернику и Петроварадину нє годно отвориц покля нє будзе достаточно особи за роботу з дзецми. Город до Министерства за локалну самоуправу послал вимогу за дошлєбодзенє анґажованя потребних роботнїкох, медзитим одвит ище вше нє сцигол.